ខេត្តរតនគីរី៖ កាលពីប៉ុន្មានឆ្នាំមុន ក្រោយពីថ្នាក់ដឹកនាំព្រមានចាត់វិធានការរហូតឈានដល់ការចាប់ឃាត់ខ្លួនឧញ៉ាដ៏មានឥទ្ធិពលបានជាបន្តបន្ទាប់ ក៏ស្រាប់បាត់មុខមួយរយះ ស្រាប់តែពេលនេះ មេឈ្មួញឈើ ឈ្មោះ ហូ ជីវ៉ៃ ដែលល្បីខាងបំផ្លាញអនុផលព្រៃឈើ ដែលជាសម្បត្តិធនធានធម្មជាតិរបស់រដ្ឋ នៅខេត្តរតនគីរី បាត់ចេញមុខមកវិញ រកស៊ីមុខរបរដដែរ សង្ស័យត្រូវដងត្រូវផ្លែជាមួយអភិបាលខេត្តរតនគិរី ដែលទើបតែកាន់ដំណែងថ្មី លោក ញ៉ែម សំអឿន បានជាហ៊ានបន្តសកម្មភាពដឹកជញ្ជូនផលអនុផលព្រៃឈើ ចេញពីស្រុកអណ្ដូងមាស ស្រុកវើនសៃ ស្រុកកោះញែក ចេញទៅប្រទេសវៀតណាម តាមច្រកអូរយ៉ាដាវ បានដោយរលូន គ្មានខ្លាចញញើតសមត្ថកិច្ចជំនាញបន្តិចសោះឡើយ ។
ប្រភពពីមន្ត្រីអត់លិតមួយចំនួនបានឲ្យដឹងថា មុននិងធ្វើសកម្មភាពដឹកជញ្ជូនឈើបានដោយរលូន និងជោគជ័យរបស់មេឈ្មួញ ហូ ជីវ៉ៃ ក៏ព្រោះតែលោក ញ៉ែម សំអឿន អភិបាលខេត្តរតនគិរីថ្មី បានបញ្ជារួចហើយថា បើមានស្ថាប័នណាផ្សេងៗចូលមកមូលដ្ឋានយើង ត្រូវសួរនាំឲ្យបានច្បាស់លាស់ អ្នកកាសែតជជុះ ទោះបីអាវុធហត្ថ ថ្នាក់ជាតិ ថ្នាក់ក្រោមជាតិ ត្រូវតែហៅមកសួរនាំ ខ្លះហួសបេសកម្ម គឺមិនឲ្យធ្វើសកម្មភាពអ្វីនៅក្នុងមូលដ្ឋានរបស់យើងបានឡើយ ។ នេះសបញ្ជាក់ឲ្យឃើញ ពីការឃុបឃិតគ្នាជាមួយមេឈ្មួញជើងខ្លាំង ហូ ជីវ៉ៃ បំផ្លាញទ្រព្យសម្បត្តិរបស់ជាតិ។
ដោយមើលឃើញពីការឃុបឃិតគ្នាកាប់បំផ្លាញ និងដឹកជញ្ជូនអនុផលព្រៃឈើ គ្មានអ្នកទប់ស្គាត់នោះ ទើបប្រជាពលរដ្ឋជនជាតិដើមភាគតិច និងប្រជាពលរដ្ឋ ដែលរស់នៅក្នុងខេត្តរតនគិរី សូមសំណូមពរ ដល់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយុទ្ធពលខេមរ:ភូមិន្ន និងជាមេបញ្ជាការកងរាជអាវុធហត្ថ លើផ្ទៃប្រទេស បង្ក្រាបធនធានធម្មជាតិ មានវិធានការ ស៊ើបអង្កេតលើមេឈ្មួញជើងខ្លាំង ដែលកំពុងតែកម្រើកឡើងវិញនេះផងទាន ។
ជុំវិញបញ្ហាខាងលើនេះដែរ អង្ភភាពយើងមិនអាចសុំការពន្យល់ណាមួយពីអភិបាលខេត្ត និង លោក ហូ ជីវ៉ៃ បានទេ ដោយទំនាក់នងទូរសព្ទនៅក្រៅតំបន់សេវា តែទោះយ៉ាងនេះក្តី អង្គភាពយើងរងចាំការបំភ្លឺរាល់ម៉ោងធ្វើការ៕
