ភ្នំពេញ៖ការអនុវត្តការរឹតបន្តឹងការច្បាប់ចចរាចរណ៍ផ្លូវគោកនៅទូទាំងប្រទេសរយៈពេល ១៩ថ្ងៃគឺគិតចាប់ពីថ្ងៃទី១ដល់ថ្ងៃទី១៩ខែឧសភាឆ្នាំ២០២០សមត្ថកិច្ចត្រួតពិនិត្យនិងផាកពិន័យយានយន្តសរុបចំនួន ២៩.៣០៦គ្រឿង។ នេះបើតាមការបញ្ជាក់របស់អ្នកនាំពាក្យអគ្គស្នងការដ្ឋាននគរបាលជាតិ ថ្លែងប្រាប់រស្មីកម្ពុជាកាលពីល្ងាចថ្ងៃទី១៩ ខែឧសភា ឆ្នាំ២០២០ ។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យ នៃអគ្គស្នងការដ្ឋាននគរបាលជាតិ បានឱ្យដឹងថា លទ្ធផលរឹតបន្តឹងការអនុវត្តច្បាប់ចចរាចរណ៍ផ្លូវគោកតាមអនុក្រឹត្យលេខ៣៩រយៈពេល១៩ថ្ងៃគិតពីថ្ងៃទី១ ដល់ថ្ងៃទី១៩ ខែឧសភា ឆ្នាំ២០២០ យានយន្តដែលត្រូវបានត្រួតពិនិត្យ និងផាកពិន័យ សរុបចំនួន ២៩.៣០៦គ្រឿង។ ក្នុងនោះម៉ូតូមានចំនួន ២១.៥៧៩គ្រឿង និងរថយន្តមានចំនួន ៧.៧២៧គ្រឿង។
លោកឧត្តមសេនីយ៍ឯកឆាយគឹមខឿនបានបន្តថាសម្រាប់ការអនុវត្តការរឹតបន្តឹងការអនុវត្តច្បាប់ចរាចរណ៍ផ្លូវគោកនៅថ្ងៃទី១៩ខែឧសភាឆ្នាំ២០២០សមត្ថកិច្ចបានត្រួតពិនិត្យនិងផាកពិន័យយានយន្តល្មើសចំនួន ១.៦០៤គ្រឿង។ក្នុងនោះម៉ូតូចំនួន ១.១៩២គ្រឿង និងរថយន្តគ្រប់ប្រភេទចំនួន ៤១២គ្រឿង។
បទល្មើសភាគច្រើនសម្រាប់ម៉ូតូ គឺមិនពាក់មួកសុវត្ថិភាពល្មើសសញ្ញានិងនិយាយទូរស័ព្ទពេលបើកបរ។ សម្រាប់រថយន្តភាគច្រើនគឺល្មើសល្បឿនអត់ខ្សែក្រវ៉ាត់និងនិយាយទូរស័ព្ទពេលបើកបរ។លោកបានបន្តទៀតថាសម្រាប់គ្រោះថ្នាក់ចរាចរណ៍នៅថ្ងៃទី១៩ខែឧសភាកើតឡើងចំនួន៣លើកស្លាប់ចំនួនម្នាក់និងរបួសចំនួន៧នាក់ ក្នុងនោះរបួសធ្ងន់៥នាក់។
ទាក់ទងការអនុវត្តច្បាប់ចរាចរណ៍ផ្លូវគោកសម្តេចក្រឡាហោមសខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានបញ្ជាក់ថាលទ្ធផលជាវិជ្ជមានប្រកបដោយនិន្នាការដ៏ល្អ។ចំពោះការរឹតបន្តឹងការអនុវត្តច្បាប់ចរាចរណ៍ផ្លូវគោកដែលធ្វើឱ្យអត្រាអ្នកស្លាប់អ្នករងរបួសនិងគ្រោះថ្នាក់ចរាចរណ៍ក្នុងរយៈពេលពីរសប្តាហ៍ក្នុងខែឧសភាឆ្នាំ២០២០មានការថយចុះគួរកត់សម្គាល់។បើប្រៀបធៀបនឹងពេលមុនមានការរឹតបន្តឹងការអនុវត្តច្បាប់ចរាចរណ៍ផ្លូវគោកនេះ៕
