ភ្នំពេញ៖កម្លាំងនគបាលព្រហ្មទណ្ឌខណ្ឌកំបូលនៃស្នងការដ្ឋាននគរបាលរាជធានីភ្នំពេញកាលពីព្រឹកថ្ងៃទី២២ខែធ្នូឆ្នាំ២០២០នេះបានបញ្ជូនជនសង្ស័យពីរនាក់ទៅតុលាការដើម្បីចាត់ការតាមច្បាប់។ជននេះពាក់ព័ន្ធករណីបាញ់សម្លាប់ជនរងគ្រោះដោយមូលហេតុពួកខ្លួនជំពាក់ប្រាក់ជនរងគ្រោះ៣០ម៉ឺនដុល្លារតែគ្មានលទ្ធភាពសងទើបរៀបចំផែនការបាញ់សម្លាប់ជនរងគ្រោះតែម្តង។
លោកវរសេនីយឯកហង្សមុន្នីអធិការនគបាលខណ្ឌកំបូលបានឱ្យអ្នកកាសែតដឹងថា៖ខ្មាន់កាំភ្លើងនិងបក្ខពួកម្នាក់ដែលបានបាញ់សម្លាប់ជនរងគ្រោះនៅភូមិទួលកីសង្កាត់ភ្លើងឆេះរទេសខណ្ឌកំបូលរាជធានីភ្នំពេញកាលពីថ្ងៃទី១៧ខែធ្នូឆ្នាំ២០២០នោះត្រូវកម្លាំងនាយកដ្ឋាននគរបាលព្រហ្មទណ្ឌដឹកនាំសហការស្រាវជ្រាវ និងឈានដល់ការចាប់ខ្លួនបាននៅថ្ងៃទី១៩ ខែធ្នូ ឆ្នាំ២០២០។
ប្រតិបត្តិការនេះធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍សន្ដិបណ្ឌិតនេតសាវឿនអគ្គស្នងការនគរបាលជាតិ, ឧត្តមសេនីយ៍ឯក សថេតអគ្គស្នងការរងការនិងជាស្នងការនគរបាលរាជធានីភ្នំពេញ, ឧត្តមសេនីយ៍ឯកអ៊ិនបូរ៉ាអគ្គស្នងការរងទទួលផែនកណ្ដាលនគរបាលយុត្តិធម៌។លោកឧត្តមសេនីយ៍ឯកង៉េងជួប្រធាននាយកដ្ឋាននគរបាលព្រហ្មទណ្ឌនិងដឹកនាំប្រតិបត្ដិការផ្ទាល់ដោយលោកឧត្តមសេនីយ៍ទោ ជាវវិបុលអនុប្រធាននាយកដ្ឋាន។
លោកវរសេនីយ៍ឯកមុំ ចេក នាយការិយាល័យ និងជាអ្នកនាំពាក្យនាយកដ្ឋាននគរបាលព្រហ្មទណ្ឌ បានឱ្យដឹងថា៖ជនសង្ស័យទាំង២នាក់ដែលសមត្ថកិច្ចជំនាញចាប់ខ្លួនបាន ទី១៖ឈ្មោះ សុខ ហេងសំបូរ អាយុ៣០ឆ្នាំជាអ្នកបាញ់និងទី២៖ឈ្មោះ ផេង ស៊ីថុល អាយុ៤០ឆ្នាំជាម្ចាស់កាំភ្លើង។
លោកវរសេនីយ៍ឯក មុំ ចេក បានបញ្ជាក់ទៀតថា៖នៅចំពោះមុខសមត្ថកិច្ចជនសង្ស័យបានសារភាពថា ពួកខ្លួនពិតជាបានធ្វើសកម្មភាពបាញ់សម្លាប់ឈ្មោះនៅចំណានពិតប្រាកដមែន។មូលហេតុដោយសារតែពួកខ្លួនជំពាក់ប្រាក់ជនរងគ្រោះច្រើនហើយគ្មានលទ្ធភាពសង។
សមត្ថកិច្ចបានបង្ហើបថាជនដៃដល់ជំពាក់លុយជនរងគ្រោះប្រមាណ៣០ម៉ឺនដុល្លារដោយសរុបទាំងដើមទាំងការ។បច្ចុប្បន្នជនសង្ស័យទាំង២នាក់ត្រូវបានកម្លាំងនាយកដ្ឋាននគរបាលព្រហ្មទណ្ឌប្រគល់ជូនអធិការដ្ឋាននគរបាលខណ្ឌកំបូល ដែលជាម្ចាស់ករណី ដើម្បីកសាងសំណុំរឿងចាត់ការបន្ដតាមនីតិវិធី។
សូមរំលឹកថាបុរសម្នាក់ត្រូវខ្មាន់កាំភ្លើងបាញ់ប្រហារចំនួន៤គ្រាប់(ត្រូវ៣គ្រាប់)ពេលកំពុងជិះម៉ូតូម្នាក់ឯងបណ្ដាលឲ្យស្លាប់ពេលកំពុងបញ្ជូនទៅមន្ទីរពេទ្យ។ហេតុការណ៍នេះបានបង្កឱ្យមានការភ្ញាក់ផ្អើលនៅវេលាម៉ោង៣រសៀល ថ្ងៃទី១៧ ខែធ្នូ ឆ្នាំ២០២០ ស្ថិតនៅតាមផ្លូវលំ ភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះឈ្មោះ នៅ ចំណាន អាយុ៤៥ឆ្នាំ មុខរបរគួកជេរដី រថយន្តម៉ូតូ ព្រមទាំងចងការប្រាក់ មានទីលំនៅក្នុងភូមិព្រៃព្រីងត្បូង សង្កាត់ចោមចៅ៣ខណ្ឌពោធិ៍សែនជ័យ។
ប្រភពព័ត៌មានពីមូលដ្ឋានបានបញ្ជាក់ថានៅមុនពេលកើតហេតុគេឃើញជនរងគ្រោះជិះម៉ូតូ ម៉ាកហុងដា PCXពណ៌សពាក់ផ្លាកលេខភ្នំពេញ1ID7477តែម្នាក់ឯងចេញពីស្ទីមនៅក្នុងភូមិស្រែជម្រៅ សង្កាត់ចោមចៅទី២ខណ្ឌពោធិ៍សែនជ័យ។លុះពេលទៅដល់កន្លែងកើតហេតុក៏ត្រូវបានជនសង្ស័យបាញ់ប្រហារតែម្ដង៕